धरान रङ्गशालामा भएको २६ औं संस्करणको बुढासुब्बा गोल्डकपको उद्घाटन

आयोजक धरान फुटबल क्लबसँगको उद्घाटन खेलमा पाहुना टोली भारत कालिम्पोङको जर्जियन फुटबल क्लब स्तब्ध बनेको छ । आयोजक धरान दोस्रो चरणमा प्रवेश गरेको छ ।

बिहीबार धरान रङ्गशालामा भएको २६ औं संस्करणको बुढासुब्बा गोल्डकपको उद्घाटन खेलमा निर्धारित समयमा बराबरी गोल भएपछि खेल टाइब्रेकरमा गएको थियो । टाइब्रेकरमा ४–२ गोल अन्तरको जित निकालेको धरानका लागि विवेक राई, राज लिम्बू, प्रज्ज्वल थापा, नगेन राईले गोल गरेका थिए । जर्जियनका लागि शरद मुण्डा र साहिजाले गोल गरे । बक्सर प्रधान र विशाल क्षेत्रीले गोल गर्न सकेनन् ।
यसअघि खेलको पहिलो हाफमा जर्जियनका हेमराज भुजेल र धरानका तपन कार्कीले गोल गरी खेललाई बराबरीमा पु¥याएका थिए । खेलको म्यान अफ द म्याच धरानका विपुल मगरले नगद १० हजार रुपैयाँ प्राप्त गरे । प्रतियोगिता उद्घाटन धरान उपमहानगरपालिकाका कार्यवाहक नगरप्रमुख अइन्द्रविक्रम बेघाले गरेका थिए । भोलि शुक्रबारको खेल रोयल थिम्पु फुटबल क्लब भुटान र झापा–११ नेपालबीच हुने आयोजकले जनाएको छ ।
बुढासुब्बा गोल्डकपको उपाधि विजेताले ट्रफी र मेडलसहित नगद १० लाख र उपविजेताले ५ लाख रुपैयाँ प्राप्त गर्नेछन् । सर्वोत्कृष्ट खेलाडीले डियो स्कुटर पाउने छन् । भोलि शुक्रबारको खेल पाहुना टोली रोयल थिम्पु फुटबल क्लब भुटान र झापाबीच हुने आयोजकले जनाएका छ ।