सोमबार साँझ अस्ताउँदो सूर्यलाई अर्घ अर्पण गरेर व्रतालुहरूले पूजा गरेका थिए भने मंगलबार बिहान उदाउँदो सूर्यलाई अर्घ दिई छठ पर्व सम्पन्न

धरान । प्रत्येक वर्ष छठ पर्व अझै समावेशी र साझा पर्वको रूपमा विकसित हुँदै आएको छ । विगतमा मुख्यतः तराईमा मात्र मनाइने यो पर्व अहिले हिमाल र पहाडसम्म फैलिँदै सबै जातजाति, भाषा र समुदायको साझा सांस्कृतिक उत्सवका रूपमा स्थापित हुँदैछ । यसैबीच, पहाड र तराईको संगमस्थल धरानमा पनि यस वर्ष सबै समुदायका नागरिकले एकै ठाउँमा भव्यताका साथ छठ पर्व मनाएका छन् ।

धरानको सेउती र सर्दु खोलाले यसपटक बेहुलीझै रूप लिएका थिए । विगतमा बालुवा, ढुंगा र पानीको सामान्य वहाव मात्र देखिने यी खोलाहरू छठ पर्वको अवसरमा दीप, फूल र रंगोलीले सजिएर झकीझकाउ बनेका थिए ।
सोमबार साँझ अस्ताउँदो सूर्यलाई अर्घ अर्पण गरेर व्रतालुहरूले पूजा गरेका थिए भने मंगलबार बिहान उदाउँदो सूर्यलाई अर्घ दिई छठ पर्व सम्पन्न गरेका छन् । छठ पर्वको अवसरमा पूजास्थलमा सबै जातजातिले एउटै ठाउँमा साझा पर्वका रूपमा छठ मनाएको दृश्यले सबैमा उत्साह र गौरवको महसुस गरेको थियो
छठ पर्वमा सहभागी सर्वसाधारणले पनि एउटै स्थानमा सबै समुदाय मिलेर पूजा गर्दा विशिष्ट अनुभव भएको बताएका छन् । उनीहरूका अनुसार सूर्यदेवको आराधना र छैठी माताको पूजाबाट मनोकांक्षा पूरा हुने जनविश्वास प्रगाढ बन्दै गएको पाइएको छ ।

विगतमा आ–आफ्नै तरिकाले मनाइँदै आएको छठ पर्वलाई अहिले व्यवस्थित रूपमा मनाउन छठ पूजा समिति गठन गरिएको छ । सूर्य र छैठी माताको महत््वका कारण समावेशी पर्वको रुपमा विकसित हुदै गएको धरानका समाजसेवी सुनिल अग्रवाल बताउनुहुन्छ ।

नेपालीहरूले मनाउने अन्य पर्वहरूजस्तै छठ पर्व पनि अहिले सबै नेपालीको साझा सांस्कृतिक सम्पदाको रूपमा विकास हुँदै गएको छ । सामूहिक रूपमा मनाउने परम्पराले आपसी सद्भाव, सामाजिक एकता र भाइचाराको सम्बन्धलाई अझ प्रगाढ बनाउँदै ल्याएको छ ।

धरानको छठ पर्वले विविधतामा एकताको सन्देश दिँदै नेपाली समाजमा सामूहिकताको सशक्त उदाहरण प्रस्तुत गरेको छ । सबै जातजातिको पर्व सामुहिक रुपमा मनाउनुपर्नेमा सबैले जोड दिएका छन् ।